നഖക്ഷതങ്ങൾ!

ഷവറിൽ നിന്നും തണുത്ത വെള്ളം ആദ്യം മുഖത്തേക്കാണ് വീഴ്ത്തിയത്...അവൻ പെട്ടെന്ന് വലതു കൈ വലിച്ചു..അവളുടെ നഖക്ഷതങ്ങളേറ്റ് കൈ ചെറുതായി മുറിഞ്ഞിരുന്നു..ഇത്തിരി ചോര പൊടിഞ്ഞിരിപ്പുണ്ട്..വെള്ളവും സോപ്പും കൂടി ചെന്നപ്പോൾ നീറാൻ തുടങ്ങി..അവളെ പോലെ തന്നെ സുഖമുള്ള ഒരു വേദന അവളുടെ നഖക്ഷതങ്ങൾക്കും..അവളെ കുറിച്ചോർത്ത്,മനസ്സും ശരീരവും ഒരു പോലെ നീറി.

കുളി കഴിഞ്ഞ് പുറത്ത് വന്നപ്പോ അവന്റെ കണ്ണുകൾ നിറഞ്ഞിരുന്നു..പക്ഷേ ചുണ്ടിൽ ഒരു ചിരി ഒളിപ്പിക്കാനാവാതെ നിന്നു വിറച്ചു..

ഭക്ഷണം കഴിക്കാൻ അമ്മ വിളിച്ചു, പതിവു പോലെ എല്ലാവരും ഇരുന്നു ഭക്ഷണം കഴിച്ചു..അച്ഛൻ ഓഫീസ് വിശേഷങ്ങളും മറ്റും പറയുന്നുണ്ടായി..എപ്പോഴത്തേയും പോലെ അമ്മ മാത്രമായിരുന്നു കേൾവിക്കാരി. പൊടുന്നനെ അവന്റെ ചെവിയിൽ അവൾ മൂളി...താൻ പറയുന്നതെന്തും കേട്ടിരിക്കും അവൾ..ഇടയ്ക്ക് ഓരോ മൂളലുകൾ..ഓരോ ചോദ്യങ്ങൾ..എത്ര നേരം വേണേലും സംസാരിച്ച് ഇരിക്കാം..എന്തിനെ കുറിച്ചും...അതുമല്ലെങ്കിൽ കണ്ടു കൊണ്ടിരിക്കാം..ആ കണ്ണുകൾ ..

ഒറ്റയ്ക്ക് ആവുമ്പോഴൊക്കെ അവൾ കൂടെ ഉണ്ടായിരുന്നെങ്കിൽ എന്നവൻ ആഗ്രഹിച്ചു..
അവളെ തന്നോട് ചേർത്ത് പിടിച്ചപ്പോ സിരകളിലൂടെ കൊള്ളിയാൻ പോയതവനറിഞ്ഞു.അവളുടെ നെറ്റിയിലേക്ക് വീണ മുടിയിഴകൾ വകഞ്ഞു മാറ്റിയപ്പോ ആ കണ്ണുകൾ തിളങ്ങി..അവ ഒരേ സമയം കൊളുത്തി വലിക്കുന്നതായും ദൂരേക്ക് മാറാൻ ആഞ്ജാപിക്കുന്നതായും അവനു തോന്നി.ആ മുഖം കൈയ്യിലെടുത്ത് ആ ചുണ്ടുകളിലേക്ക് ചുണ്ടമർത്താനൊരുങ്ങവേ അവളവനെ തള്ളി മാറ്റി..വിറക്കുന്ന ചുണ്ടുകൾക്ക് മീതെ ,വിയർപ്പു പൊടിഞ്ഞ മൂക്കിൻ തുമ്പിനു മീതെ നിറഞ്ഞ കണ്ണുകൾക്ക് മീതെ മുടിയിഴകൾക്ക് ഇടയിലൂടെ അവളുടെ നെറ്റിയിലെ സിന്ദൂരം അവനെ തള്ളി മാറ്റി.

അവളുടെ നഖം കൊണ്ടു പൊടിഞ്ഞ ചോരയെടുത്ത് ആ നെറ്റിയിൽ സിന്ദൂരം തൊടീക്കാൻ അവൻ കൊതിച്ചു. പിന്നീടവനറിഞ്ഞു...നീറ്റൽ മാത്രമേ തനിക്കവകാശപ്പെട്ടതുള്ളൂ എന്ന്..

ഇന്ന് കൂടെ കിടക്കുന്ന ഭാര്യയിലേക്ക് പടർന്നു കയറുമ്പോഴും അവളുടെ കൈകൾ അവനെ മുറിവേൽപ്പിച്ചു കൊണ്ടിരുന്നു.