എന്റെ പെരുന്നാൾ!

എനിക്കും കൂടണം ഒരു പെരുന്നാൾ...
തറാവീഹ് കഴിഞ്ഞ് "ഈദ് മുബാറക് " പറഞ്ഞ് പള്ളിയിൽ നിന്നിറങ്ങി ബൈക്ക് ഓടിച്ച് അങ്ങാടിയിൽ പോയി കൂട്ടുകാരെ കണ്ട്, പെരുന്നാൾ ചോറ് വേഗം കഴിച്ച് പോവേണ്ട സ്ഥലങ്ങളും കാണേണ്ട കൂട്ടുകാരേയും ,കാണേണ്ട സിനിമകളേയും കുറിച്ച് മാത്രം ആലോചിക്കുന്ന പെരുന്നാൾ..

അല്ലാതെ..പെരുന്നാളിനുള്ള ബിരിയാണിക്ക് വേണ്ട സാധനങ്ങൾ തയ്യാറാക്കണോ അതോ അത്താഴം തയ്യാറാക്കണോ എന്നോർത്ത് പള്ളിയിൽ നിന്ന് തക്ബീറിന് കാതോർത്തു കൊണ്ടല്ല എന്റെ പെരുന്നാൾ രാവുകൾ കൊഴിഞ്ഞു തീരേണ്ടത്...ബാല്യത്തിലെന്ന പോലെ എല്ലാ പെരുന്നാൾ രാവുകളിലും കൈകാലുകളിൽ മൈലാഞ്ചി മൊഞ്ചും മണവും വേണം...

പെരുന്നാളിനു രാവിലെ കുളിച്ചൊരുങ്ങി പുതിയ ഉടുപ്പിട്ട് എനിക്കും കൂടണം ഈദ് ഗാഹിൽ ..എനിക്കും ഇരുന്ന് ഓരോരുത്തർക്കും ഈദ് മുബാറക് മെസേജുകൾ അയക്കണം..പെരുന്നാൾ ദിന പ്രത്യേക പരിപാടികൾ കാണണം ടി.വിയിൽ..വൈകീട്ട് എനിക്കും പോവണം കടലു കാണാൻ..സിനിമ കാണാൻ..

ഓണവിശേഷങ്ങൾ അറിയാൻ വിളിച്ചപ്പോ കൂട്ടുകാരിയും പറഞ്ഞു ഇങ്ങനെ ഒരുപാട് ആഗ്രഹങ്ങൾ...ക്രിസ്തുമസ് വരാനിരിക്കുന്നേ ഉള്ളൂ...